Ich möchte ein Gnom werden

    No ned öberzügt?

    Ech be immer no ned ganz öberzüügt…!!  Den lömmer doch eifach die z› Wort cho, wo erst grad vor chorzem de Schritt zu eus „gwoogt“ hend, eusi Neu-Gnome:

    RetoMis Instrument: Horn Bi de Gnome will? Well mini Gedanke nach paar Johr Pause weder ine Guggemusig z’go im Chopf ume gschwiirt sind und ich so z’säge i Gwössne Gnome direkt id Arme gfloge bin. Mini Zwiifle ob ech s’rechtige mache, send nach 3 Probe verfloge! Warum söllsch Du zo de Gnome? Mer werd vo Tag eis scho met offne Arme empfange und gschätzt, do fühlsch dech grad am rechtige Ort. Wenn en Super Hufe wotsch und met Ehne Musig wetsch mache, de chom zu Eus!
    MartinaMis Instrument: Horn Bi de Gnome will? En gueti Fröndin und ich hend zunere typische Lozärner Guggemusig welle ond mer hend bereits veli Uftrett vo de Chappelgnome mitgfiiered. Ond obwohl mer fascht niemert könnt hend, semmer vo Afang a met offne Arme empfange worde. Warum söllsch Du zo de Gnome? En bunt durchmischte, geile Huufe miteme kollegiale Umgang und mer fühlt sich schnell als Teil vo dere Guggemusig.
    ConnyMis Instrument: Posuune Bi de Gnome will? Ich ha scho sit einige Johre zu de Chappelgnome welle. Das isch eifach en Verein wo mer sech vom erste Tag a willkomme und wohl fühlt. Und das gspührt mer au als Zueschauer, die Herzlichkeit und s’Unkomplizierte hend mer scho immer imponiert! Warum söllsch Du zo de Gnome? D’Gnome hend wirklich coole Sound ond es wird güebt, bis es sitzt, so dass es denn auch wirklich guet tönt. Schön ist, wie Anfänger ufem Instrument begleitet werded. D’Gnome send en «riese Huufe» aber trotzdem «fascht en Familie». Was ech söscht no wett säge: Chom zu de Gnome und du wirsch öppis erläbe, was dir es ganz neues Fasnachtsfeeling bringt!
    ManuelaMis Instrument: Trompete Bi de Gnome will? Es isch für mich en Herzenswunsch gsi binere Lozärner Musig mitzspiele. D’Chappelgnome hend mich scho sit es paar Johr faszniert, sie händ mis Guggemusigherz höher schlo loh. Warum söllsch Du zo de Gnome? Will jede mit jedem chan eis trinke, en riese Zämehalt und ufgstellti, tolli Lüüt. Be mit offne Arme empfange worde. Was ech söscht no wett säge: I bin zu 100% am richtige Ort. Das chasch du au sii!
    RamonaMis Instrument: Trompete Bi de Gnome will? …well ich set ech cha dänke a de Fasnacht mit debii be ond s för mech scho emmer klar gsi esch, dass ech früehner oder spöter mal Teil vonere Guggemusig werd sii. D Rolle als Zueschauer hani gnueg lang gspielt, ez versuech ichs met de Trompete! För d’Gnome han ech mech entschiede, well ech zonere grosse Stadtlozärner Guggemusig ha welle ghöre, wo mech Jahr för Jahr musikalisch begeistered hed. So han ech mech, obwohl ech praktisch niemert könnt hat, als Neumitglied beworbe. Scho nach chorzer Ziit i dem Verein han ech gwösst, dass ech die richtig Entscheidig troffe ha Was ech söscht no wett säge: Bis jetzt hani en sehr idröckliche, tolle Start is Vereinsläbe miterläbt. Cha d Fasnacht und de erst Uftritt uf de Stäge chuum erwarte!
    AndyMis Instrument: Trompete Bi de Gnome will? Statt dabei jetzt mittendrin! Inere Lozärner Guggemusig mitzwirke esch scho immer en grosse Traum gsi. Nach 15 Johr hani de Traum jetzt bi de Gnome chöne verwirkliche. Warum söllsch Du zo de Gnome? Wenn binere musikalisch guete ond sehr familiäre Musig willsch mitwirke, bisch bi de Gnome genau richtig.
    JoyMis Instrument: Horn Bi de Gnome will? Ech be med de Gnome ufgwachse ond ha daher scho velli vo ehne sit chli uf kennt. För mech esch es drom emmer klar gsi dass ech mol zo de Chappelgnome wet. Warum söllsch Du zo de Gnome? Es esch en tolli Trope wo jede ufnimmt ond en Chance ged. Mer hend cooli Stöck zom spiele ond es ged emmer öppis zom Lache. Was ech söscht no wett säge: Ech freue mech riesig uf en lostigi Fasnacht met de Gnome.

    Du, ein Gnom?

    • Hesch du au de Plausch a de Lozärner Fasnacht?
    • Möchtisch du d’Fasnacht aktiv mitgestalte?
    • Die rüüdige Täg, also de absoluti Höhepunkt vo de Lozärner Fasnacht, huutnöch miterläbe?
    • Könnsch velecht sogar scho es paar vo de Gnome oder möchtisch sie no könnelehre?
    • Dier gfallt euse Sound?
    • Du hättisch de Plausch, es Sujet kreativ umzsetze?
    • Du besch gern inere lostige Rondi amene Fest?

    Wenn du mindestens 11 von dene 7 Froge met JO chasch beantworte ond 18ni gsi besch (oder gli wersch), den besch be üs genau richtig, also nüd wie los ond s’Ameldeformular usfölle!

    Öbrigens, be üs muesch weder Vorspele no en Musig-Schuel bsuecht ha! Natürlich esch es toll, wenn du scho es Instrument chasch, aber au Afänger findet be de Gnome emmer en Platz!

    Hüüfige Usrede… ääähh Froge

    • Ich ha jo gar keis Instrument glehrt ond/oder cha kei Note läse!
      Keis Problem, mer au ned! Aber mer helfed dier gern debi, dass au du dies Wonsch-Instrument gli im Greff hesch.
      Ond söscht send au helfendi Händ am Kafiwage oder als Fahneträger sehr willkomme!
    • Ich könne veli Lüüt be andere Musige!
      Macht nüd, mer jo au.
    • Äääh ech möchte a de Fasnacht ned bonde si, sondern selber omezieh ond dete hi go, wo’s mer gfallt!
      Wenn du met dine Gnome-Gspändli onderwegs besch, besch garantiert dete, wo’s dier gfallt.
    • Ich weiss ned, öb ech gnüegend Ziit ha?
      Ziit hed mer nie eifach so, die muess mer sech nä! Aber wenns eim werkli Spass macht, den nimmt mer sech die Ziit gern.
    • Ich ha no meh Froge, aber getrau mech ned, die z’stelle?
      Kein Angst, eifach üs kontaktiere, mer wössed uf jede Frog en blödi Antwort.

    Mer wärded chorz noch de Fasnacht alli Bewerberinne und Bewerber zumene Info-Obig ilade. Dete erfahrsch alles, was es wössenswerts rond om üse Verein geht.

    Neumitglieder send aber au spöter no herzlich Willkomme, also nor well de Info-Obig verpasst hesch, brecht kei Welt zäme. Meld dech eifach be üs.

    Wieteri Uskönft gänd dier aber au jederziit gern de Präsi Sammy von Ah oder üse Tambi Yves Inderbitzin.